CBS ta presentá sifra di e poblashon di Kòrsou pa promé di yanüari 2026
Willemstad - Awe Ofisina Sentral di Statistik (CBS) ta presentá riba su wèpsait e sifranan di poblashon di Kòrsou pa 1 di yanüari 2026.
Kalkulashon di e sifra di poblashon pa aña
Den e añanan ku no tin senso, e poblashon di Kòrsou ta ser kalkulá usando datonan di Kranshi. Pa kalkulá esaki ta hasi uso di sifranan di nasementu, fayesementu, imigrashon i emigrashon.
Ora risibi e archivo (bestand) di e registro di Kranshi ta limpia esaki pa kita inkonsistensia nan, manera rekortnan dupliká di e mes un persona òf rekortnan ku di e aña anterior ku a keda registrá den e aña nobo. Despues ku tin e dataset limpiá ta kuminsa analisá e datonan i ta publiká e tabèlnan riba wèpsait di CBS.
Algun sifranan importante ta:
Poblashon
- Poblashon di Kòrsou a subi ku 1,891 persona entre promé di yanüari 2025 i prome di yanüari 2026. E poblashon total tabata konsistí na 1 yanüari 2026 di 158.006 persona.
Fertilidat
- Na 2025 a nase 1029 yu (907 yu hòmber i 888 yu muhé). Esaki ta 93 yu ménos ku na 2024.
- E kantidat di yu na bida pa kada 1000 habitante ta 6.6 na 2025. Esaki tabata 7.2 na 2024.
- Serka hende muhé den kategoria di edat di 30-34 aña a nase mas tantu yu kompará ku e otro kategorianan di edat.
- E edat averahe ku hende muhé ta haña yu na 2025 ta 29.4 (2024 esaki tabata ta 29.5), pues a keda konstante.
Imigrashon i Emigrashon
Na 2025 tabatin 5902 persona ku a imigrá pa Kòrsou. Pa aña 2025 a emigrá 3.487 persona for di Kòrsou. E saldo di migrashon pa aña 2025 tabata 2.495.
Mortalidat
- 1553 persona a fayese na 2025 (776 hende homber i 777 hende muche)..
- Den e kategoria di edat di 80-84 aña tabatin mas tantu hende ku a fayesé, kompara ku den e sobrá kategorianan di edat.
- E mortalidat bou di 1 aña di edat riba kada 1000 yu ku nase bibu (mortalidat infantil) tabata 11,7 na 2025 (pa 2024 esaki tabata 11.6).
Pa mas informashon i tur otro detaye por fabor bishitá nos página di wèpsait, Population | Central Bureau of Statistics Curaçao