CBS ta presentá riba su wèpsait resultado di Enkuesta Forsa Laboral 2024 i kuater publikashon nobo di Senso 2023

Willemstad; Durante di un konferensia di prensa awe Ofisina Sentral di Statistik (CBS) Kòrsou a presentá Resultadonan di Enkuesta Forsa Laboral ku a ser ehekutá na aña 2024. Na mes un momentu a presentá tambe kuater publikashon nobo di Senso 2023.

Resultado di Enkuesta Forsa Laboral 2024
CBS a tene Enkuesta di Forsa Laboral (AKO) na Kòrsou entre 19 di òktober i 30 di novèmber 2024. Enkuesta di Forsa Laboral ta un sondeo bou di e kasnan di famia ku CBS ta tene tur aña den luna di sèptèmber/òktober for di 1987. Meta di e enkuesta aki ta pa midi e desaroyonan mas resien riba merkado laboral, manera e sifra di desempleo, e nivel di partisipashon, e kantidat di habitante ku tin trabou i e kantidat ku ta buskando trabou. 

Aki ta sigui algun resultado importante di Merkado Laboral pa aña 2024.

Entre 2022 i 2024 e sifra di desempleo a baha di 13.1% pa 7.8% respektivamente. Si mira e sifra apsoluto por mira ku tin un bahada di 3.941 persona ku ta buskando trabou (desempleá), igual na un bahada di 39.3%.

  • E total di personanan empleá a subi di 66.722 persona na aña 2022 te 71.919 persona na aña 2024. Kual ta un subida di 5.197 persona.

  • Tin un bahada tambe di e total di persona ku aktivamente ta buskando trabou (desempleo). Esaki a baha di 10.035 persona na aña 2022 pa 6.094 na aña 2024. Segun definishon internashonal ku CBS ta usa pa por kompará sifranan di Kòrsou ku otro pais, por kalifiká un persona komo unu ku ta buska trabou solamente si e persona ta buskando aktivamente (solisitando) i lo por kuminsá denter di 2 siman si e haña un trabou. 

  • Poblashon aktivo (beroepsbevolking)  na Kòrsou, esaki ta wòrdu definí komo e total di e personanan ku ta empleá huntu ku esnan ku ta buskando trabou. E grupo aki a subi di 76.575 na 2022 te 78.013 persona na aña 2024.Esaki ta un diferensia di 1.256 persona. Sinembargo, e poblashon ekonómikamente inaktivo a krese tambe. Un kantidat di 7.440 persona mas a bira inaktivo, pa un total di 54.919. Esaki ta un kresementu di 15.7%.

  • Sifra di desempleo bou di hóben (15-24 aña) a baha di 29.8% na aña 2022 pa 16.3% na aña 2024. E total di hóbennan (15-24 aña) entre 2022 ku 2024 a baha ku 358 hóben. Ta importante pa indiká ku e sifra di labor ta ser midi for di 15 aña i ku hopi di e hóbennan entre 15-24 aña ta bayendo skol òf ta sigui un kurso pero ta buska podisé un ‘bijbaantje’. Bo ta wòrdu konta komo desempleado si bo ta buska trabou aktivamente i si bo por kuminsá traha dentro di 2 siman.

Mas detaye di e merkado laboral 2024, na sekso i edat, ta aksesibel riba e wèpsait di CBS https://www.cbs.cw/labour

---------------------------------------------------------------------------------------------------------

Publikashonnan (demografia, enseñansa, labor i entrada) ku datonan di Senso 2024.

Kada publikashon ta duna un análisis mas detayá di e tema spesífiko, ku informashon adishonal, tabèlnan i visualisashon ku ta yuda komprondé mihó e tendensianan i patronchi den e datonan. E publikashonnan ta bai mas profundo den e resultadonan di Senso 2023:

  • E publikashon tokante Demografia ta trata struktura di e poblashon, edat, sekso, komposishon di kas i migrashon, entre otro.
  • Den e publikashon tokante Enseñansa, CBS ta presentá nivel di skol finalisá, diferensianan entre seksonan, i kumplimentu ku e lei di skol obligatorio.
  • E publikashon tokante Labor ta enfoká riba partisipashon den merkado laboral, nivel di desempleo, tipo di trabounan i otro aspektonan laboral di e poblashon.
  • E publikashon tokante Entrada ta analisá distribushon di entrada, fuentenan di entrada i nivel di entrada tantu na nivel personal komo di kas di famia.

Ademas di e kuater publikashon ku ta disponibel aktualmente, CBS ta informá ku tin vários otro publikashon basá riba e datonan di Senso 2023 ku lo wòrdu publiká den futuro. Entre esakinan ta un visualisashon riba nivel di bario yamá ‘Neighbourhood Viewer’, un publikashon tokante bibienda i su karakterístikanan, un análisis profundo tokante salubridat, i un publikashon dediká na migrashon.

Por último
Riba wèpsait di senso por download tur e publikashonnan aki. https://senso.cbs.cw/publications-census-2023. Riba e site aki, tur informashon ku CBS a publiká kaba i ta bai publiká den futuro ta aksesibel.

CBS ta gradisí tur e kasnan di famia ku a kontribuí na éksito di e enkuestanan akí.

Komunikado di prensa Resultado di Enkuessta Forsa Laboral 2023