CBS Kòrsou ta lansa publikashon tokante identidat nashonal, aseptashon sosial i diskriminashon na Kòrsou riba su wèpsait

Willemstad – Ofisina Sentral di Statistik (CBS) ta lansa awe un publikashon nobo titulá: ‘Nationale identiteit, sociale acceptatie en discriminatie op Curaçao’
E publikashon aki ta analisá identidat nashonal, aseptashon sosial i diskriminashon na Kòrsou. E publikashon ta kompará datonan basá riba e resultadonan di dos investigashon representativo: Enkuesta di Koheshon Sosial 2015 i e Enkuesta Sosial di aña 2025.

Algun resultado:

E publikashon ta duna un bista riba e manera ku habitantenan di Kòrsou ta definí kiko ta hasi un persona un "Yu di Kòrsou" i kon e persepshonnan aki a desaroyá den e último dies aña. Na 2015, ta un Yu di Kòrsou tabata asosiá prinsipalmente ku papia Papiamentu (81,1%) i ku nase na Kòrsou (80,9%). E mayoria di e respondentenan a konsiderá ku yu di migrantenan ku a nase na Kòrsou ta un Yu di Kòrsou (84,0%).

E resultadonan di 2025 ta mustra un imágen similar. Nase na Kòrsou (76,4%) i papia Papiamentu (71,5%) ta sigui siendo karakterístikanan importante di identidat komo un Yu di Kòrsou. Ademas, 77,1 porshento di e respondentenan ta indiká ku yu di migrantenan ku a nase i krese na Kòrsou tambe mester wordu konsiderá komo un Yu di Kòrsou.

Ademas, e publikashon ta mustra un oumento den aseptashon sosial pa diversidat étniko i religioso. 15,8% di e respondentenan a indiká ku nan tabatin oponensia pa tin bisiña ku un otro trasfondo étniko òf orígen, miéntras ku 13,5% a indiká ku nan tabatin oponensia pa tin bisiña ku un otro religion.

Na 2025, e porshentonan aki a baha pa 11,0% i 7,8% respektivamente. Na mes momentu, mas ku 80% di e poblashon a indiká ku nan no tin ningun opone pa tin bishina ku un otro trasfondo étniko òf religioso. E desaroyo aki ta indiká ku aseptashon sosial pa diversidat étniko i religios na Kòrsou a oumentá.

Segun e Enkuesta di Koheshon Sosial 2015, 76,2% di e poblashon a indiká ku nan no a eksperensiá diskriminashon. Na otro banda, 20,3% a indiká ku nan a eksperensiá diskriminashon di bes en kuando, miéntras ku 3,5% a indiká ku esaki a yega di sosodé ku frekuensia. Di e 23,8% ku a eksperensiá diskriminashon, 11,8% tabata relata na koló di kurpa, 11,0% na pais di nasementu, 8,5% na idioma i 4,6% na religion.

Durante Enkuesta Sosial di 2025 no tin datonan komparabel disponibel, p'esei no ta posibel evaluá si diskriminashon eksperensiá a oumentá òf a baha. 

Ku e publikashon aki, CBS ke kontribuí na un mihó komprendementu di e desaroyonan sosial na Kòrsou i ta pone datonan konfiabel disponibel pa gobièrnu, investigadónan, organisashonnan i henter e komunidat.

E publikashon kompletu por wordu download usando e link aki : Nationale identiteit, sociale acceptatie en discriminatie op Curaçao | Central Bureau of Statistics Curaçao