Enkuesta Sosial 2026
Entre 19 di sèptèmber i 14 di novèmber 2026, Ofisina Sentral di Statistik (CBS) lo ehekutá Enkuesta Sosial 2026. CBS lo bishitá un total di +/-4000 kas di famia ku a wòrdu selektá.
Meta di Enkuesta Sosial 2026.
Meta di Enkuesta Sosial 2026 ta pa kolektá informashon aktual i konfiabel tokante situashon sosial i kondishonnan di bida di e poblashon di Kòrsou.
Pa medio di e resultadonan di e enkuesta aki, Kòrsou por haña un mihó bista di diferente aspektonan ku ta influensiá bida diario di nos poblashon, manera salú i bienestar, bibienda, preparashon pa situashonnan di emergensia i otro temanan sosial importante.
E resultadonan lo yuda pa identifiká desaroyonan, nesesidatnan i retonan den nos komunidat. E informashon por sirbi komo base estadístiko pa Gobierno, organisashonnan, investigadónan i otro instansianan pa planifikashon, investigashon i desaroyo di maneho. Alabes, e resultadonan ta duna poblashon un mihó bista di realidat sosial di Kòrsou.
Ken a ser selektá pa partisipá na e enkuesta aki?
Bo adrès a wòrdu selektá pa medio di un asina yama 'steekproef'.
Un 'steekproef' ta un selekshon di adrèsnan na Kòrsou ku CBS ta usa pa bishitá kasnan di famia durante di un enkuesta. CBS ta bishitá solamente e selekshon di adrèsnan aki. CBS ta usa un método estadístiko pa e kontestanan di e personanan selekshoná por representá e poblashon kompleto di Kòrsou.
Un 'steekproef' no ta un konteo kompleto di e poblashon manera un Senso ta. Enkuesta Sosial ta un steekproef pa e motibu aki ta bai solamente e adrèsnan (+/-4000 kas) selektá den diferente bario na Kòrsou. P'esei bo ta mira ku CBS ta bishitá bo kas pero no di bo bisiña.
Durante di un Senso CBS ta bishitá tur kas di famia (adrès) na Kòrsou.
Kua tópikonan Enkuesta Sosial 2026 ta kubri?
Durante e Enkuesta Sosial 2026, lo hasi preguntanan tokante e siguiente temanan:
- Labor: e.o si bo ta traha òf ta buskando trabou,
- Kalamidat: kon e habitantenan ta prepará pa un kalamidat
- Bibienda: e.o. Kua ta bo situashon di bibienda aktual.
Salubridat: e.o. Ki opion bo tin tokante bo salu e.o.l.
Bo por lesa mas detaye di kada topiko mas abou di e pagina aki.
Kiko ta pasa ora enkuestadó di CBS bishitá bo kas?
Ora un enkuestadó di CBS yega na bo kas:
- E ta bati na bo porta
- E ta mustra bo su identifikashon ofisial
- E ta splika bo pa kiko e la bini na bo kas (pa kua enkuesta)
- E ta pidi pa hasi un entrevista kortiku
- E ta hasi abo i bo famia e preguntanan riba e 4 temanan di Enkuesta Sosial 2026
⏱️ E entrevista ta tuma aproksimadamente 20–30 minüt (depende kon grandi bo kas di famia ta)
Kon pa rekonosé un enkuestadó di CBS?
Un enkuestadó di CBS semper:
- ✔️ Tin un badge ku tin su nòmber, potrèt i un qr code
- ✔️ Tin un hesje blou ku logo di CBS bisti
- ✔️ Semper mester identifiká su mes ora e yega na bo kas ku e badge
👉 Si bo tin duda, bo por òf scan ku bo selular e qr code riba e badge òf bo por tuma kontakto ku CBS na e siguiente nr di telefon : 724-1802 òf 520-2227. Bo por manda un app tambe na 520-2227
Bo dato ta konfidensial.
Tur informashon ku bo duna ta kompletamente konfidensial i nunka lo wòrdu kompartí ku otro instituto òf publiká individualmente. Konforme ku Lei di Statistik (PB 2011, no. 19), bo dato lo ser tratá di forma konfidensial i anónimo. E publikashon ofisial (PB) di e lei aki ta disponibel riba website di CBS: www.cbs.cw/statistical-act-2011-nr-19.
Bo ke mas informashon tokante e enkuesta aki?
Bo por tuma kontakto ku nos na:
📞 Tel: 724-1802
💬 WhatsApp: 520-2227
📧 Email: info@cbs.cw
òf klek riba FAQ pa e pagina di Preguntanan mas hasi na papiamentu, ingles, hulandes i spaño.
Labor ta un parti importante di desaroyo ekonómiko i sosial di Kòrsou. Informashon tokante ken tin trabou, ken ta buska trabou, entrada i kondishonnan di trabou ta yuda nos komprondé mihó e situashon di merkado laboral.
E datonan aki ta importante pa gobièrnu, empresanan, institushonnan di edukashon, organisashonnan sosial i komunidat. Nan ta yuda pa desaroyá maneho, planifiká formashon i kreá mas oportunidat di trabou.
Ehempel di preguntanan:
- Bo tin trabou òf bo ta buska trabou?
- Bo tin bo propio negoshi?
- Den kua sektor bo ta traha?
- Kua posishon bo tin na trabou?
- Bo ta buska trabou i dikon?
- Kuantu bo entrada ta?
- Bo ta hasi trabou boluntario?
🧩 Informashon riba labor ta un pida di e pùzel ku ta yuda forma un bista mas kompleto di bida sosial na Kòrsou.
E sekshon aki ta investigá kon prepará poblashon di Kòrsou ta pa situashonnan di emergensia òf krísis. E informashon ta yuda pa komprondé nivel di preparashon i unda tin nesesidat pa mas informashon òf sosten.
E resultadonan por yuda gobièrnu i organisashonnan di emergensia mehorá komunikashon i preparashon pa kalamidat.
Ehempel di preguntanan:
- Kon prepará bo ta pa un emergensia?
- Ki artíkulo esensial bo tin na kas?
- Unda bo ta buska informashon durante un krísis?
- Kua situashon bo ta konsiderá e riesgo mas grandi?
🧩 Informashon riba kalamidat ta un pida di e pùzel ku ta yuda forma un bista mas kompleto di bida sosial na Kòrsou.
Bibienda ta importante pa kalidat di bida. E sekshon aki ta investigá situashon di bibienda, si e kas ta adekuá i aksesibel, i si gastunan di bibienda ta pagabel.
E resultadonan por yuda gobièrnu, organisashonnan sosial i sektor di konstrukshon identifiká nesesidat di bibienda i planifiká mihó pa futuro.
Ehempel di preguntanan:
- Kua ta bo situashon di bibienda aktual?
- Den ki tipo di kas bo ta biba?
- Bo kas ta adekuá pa bo nesesidat físiko òf di salú?
- Kon pagabel gastunan di bo bibienda ta?
- Bo kas tin mester di adaptashon?
🧩 Informashon riba bibienda ta un pida di e pùzel ku ta yuda forma un bista mas kompleto di bida sosial na Kòrsou.
Salú ta importante pa kalidat di bida. E sekshon aki ta kolektá informashon tokante salú, kuido médiko, prevenshon, aktividat físiko, alimentashon, strès i sosten sosial.
E resultadonan por yuda gobièrnu, instansianan di salú i organisashonnan di prevenshon ku planifikashon, investigashon i desaroyo di maneho i programa di salú.
Ehempel di preguntanan:
- Kon bo ta evaluá bo salú?
- Bo tin un malesa òf kondishon króniko?
- Kuantu biaha bo ta bishitá dòkter?
- Bo ta hasi eksámen preventivo?
- Kon aktivo físikamente bo ta?
- Kuantu strès bo ta eksperensiá?
- Kuantu biaha bo ta kome fruta i berdura?
🧩 Informashon riba salubridat ta un pida di e pùzel ku ta yuda forma un bista mas kompleto di bida sosial na Kòrsou.