Enkuesta Sosial 2026

Labor ta importante den un komunidat; e ta sòru pa kresementu ekonómiko. Hende ku ta traha ta produsí produkto i servisionan ku ta mantené i pone e ekonomia sigui krese. Informashon tokante ken tin trabou, ken ta buska trabou, i kon e kondishonnan di trabou ta, ta duna un bista kla riba e oportunidatnan i desafionan laboral na Kòrsou. E ta yuda pa drecha maneho, pa traha mas kupo di trabou.

Informashon tokante Merkado Laboral (Trabou i entrada) ta importante pa:

1. Gobièrnu i trahadó di maneho – pa desaroyá maneho tokante labor, formashon i desaroyo ekonómiko.
2. Empresario i sektor privá – pa komprondé oferta i demanda di labor i planifiká mas mihó nan negoshi.
3. Institushon di edukashon i formashon – pa aliniá e konosementu i abilidat di e poblashon ku e nesesidat real di merkado laboral.
4. Organisashonnan sosial i sindikal – pa defendé derecho i kondishon di empleadonan.
5. Komunidat i individuonan – pa haña klaridat riba oportunidat di trabou i situashon di merkado laboral na nos isla.
   
   E dato di merkado laboral ta yuda gobièrnu, negoshi, skol i komunidat pa tuma desishon ku ta kreá mas oportunidat pa trabou i un ekonomia mas fuerte.

Ehempel di preguntanan:

• Bo tin trabou of bo ta buskando trabou ?
• Bo tin un propio negoshi?
• Den kua ramo e empresa ta kai
• Kua posishon ekonomiko bo tin na e trabou
• Bo ta buskando trabou i dikon?
• Ku at bo entrada
• Bo ta hasi trabou boluntario?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

E sekshon aki ta investigá kon habitantenan di Kòrsou ta mira i prepará nan mes pa posibel situashonnan di emergensia i krísis. E preguntanan ta trata, entre otro, e nivel di preokupashon i preparashon, artíkulonan esensial disponibel pa emergensia, fuente di informashon, riesgonan ku hende ta mira komo mas importante, eksperensianan anterior ku situashonnan di emergensia i preparashon pa orkán i tormenta tropikal.

E resultadonan lo duna un bista riba e nivel di konsenshi i preparashon di kasnan di famia na Kòrsou, i riba kaminda por tin nesesidat pa mas informashon òf sosten.

E informashon ta importante pasobra e ta mustra kon prepará poblashon di Kòrsou ta pa situashonnan di emergensia i krísis, kua riesgonan nan ta konsiderá mas grandi, unda nan ta buska informashon i kiko nan mester pa por prepará mihó.

E resultadonan por ta importante pa :

• Gobierno, 
• instansianan enkargá ku maneho di krísis i kalamidat, 
• organisashonnan di emergensia i 
• otro organisashonnan relevante. 
  Nan por usa e informashon pa mehorá komunikashon, kampañanan di informashon i medidanan di preparashon pa situashonnan di emergensia.

Ehempel di preguntanan

• Kon preokupá bo ta pa krísis internashonal òf regional ku por tin konsekuensia pa Kòrsou?
• Kon prepará bo ta personalmente pa un situashon di emergensia?
• Ki artíkulonan esensial bo tin disponibel na kas pa un emergensia?
• Kua fuente di informashon bo ta usa ora tin un krísis òf emergensia?
• Kua situashon bo ta konsiderá e riesgo mas grandi pa bo kas di famia?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Bibienda ta un parti importante di kalidat di bida. No ta trata solamente di tin un dak riba bo kabes, sino tambe si e kas ta adekuá pa e nesesidatnan di e personanan ku ta biba aden, si e gastunan di bibienda ta pagabel i si hende por sigui biba den nan kas ora nan situashon físiko òf di salú kambia.

Pa haña un bista riba situashon di bibienda na Kòrsou, CBS ta hasi diferente pregunta. Por ehèmpel: 

• Bo ta doño di e kas kaminda bo ta biba òf bo ta hür? 
• Ki tipo di bibienda bo ta biba aden? 
• Kon adekuá bo kas ta pa bo kondishon físiko i di salú? 
• Tin adaptashonnan hasi den bo kas? 
• Kon pagabel bo gastunan di bibienda ta? 
• I unda i den ki tipo di bibienda bo lo preferá biba den futuro?

Tambe nos ke sa kiko hende ta preferá si nan nesesidatnan kambia: keda biba den nan kas aktual, adaptá e kas, muda pa un bibienda mas adekuá òf skohe pa otro forma di bibienda. E preguntanan ta duna tambe informashon tokante kon hende lo por finansiá adaptashonnan nesesario na nan kas.

E informashon aki ta importante pa komprondé kon e nesesidat di bibienda di poblashon ta desaroyando awor i den futuro. E resultadonan por ta di balor pa Gobierno, instansianan ku ta traha riba tereno di bibienda, planifikashon urbano, kuido i bienestar, i otro organisashonnan ku ta envolví den desaroyo di bibienda na Kòrsou.

E datonan por yuda pa identifiká, entre otro, e nesesidat pa bibienda pagabel, kas adaptá òf aksesibel, bibienda pa personanan grandi di edat i otro formanan di bibienda, i asina sirbi komo informashon pa planifikashon i maneho den futuro.

E informashon tokante bibienda ta util pa: 

1. Gobiernu di Kòrsou – pa sa tokante skarsedat di kas, ken tin mester di kas, i pa planifiká desaroyo di bario i infrastruktura.
2. Fundashonnan sosial i di bario – pa wak si tur grupo, inkluyendo hende ku entrada abou, tin akseso na kas adekuá.
3. Desaroyadonan i kompania di konstrukshon – pa ofresé kas ku ta keda den nesesidat real di komunidat.

Ehempel di algun pregunta:

• Kua ta bo situashon di bibienda aktual? Bo ta doño di e kas, bo ta hür, òf bo ta biba serka famia?
• Den ki tipo di bibienda bo ta biba? Por ehèmpel, un kas separá, kas pegá na otro, apartamento òf kamber den un kas kompartí.
• Kon adekuá bo bibienda ta pa bo kondishon di salú òf limitashonnan físiko?
• Tin adaptashonnan hasi na bo kas pa hasi'é mas aksesibel òf sigur pa bo?
• Kon pagabel e gastunan di bo bibienda ta pa bo kas di famia?
• Si bo kas mester adaptashon, kon bo ta pensa di finansiá esaki?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Un bon salú ta permití hende biba mas largu, felis i ta mas produktivo. Hende saludabel por traha, studia i kontribuí na ekonomia. Informashon di salú i bienestar ta mustra kon hende mes ta haña nan salú, kon nan ta haña kuido médiko i si nan tin akseso na e servisionan ku nan mester. Ku e informashon aki por ahustá maneho di salubridat.

E informashon tokante salubridat ta util pa: 

1. Ministerio di Salú  – pa planifiká kuido médiko i maneho públiko mihó.
2. Sektor di salú – pa komprondé kon hende ta haña kuido.
3. Organisashonnan sosial i di bario – pa identifiká nesesidat lokal i promové estilo di bida saludabel.
4. Komunidat i famianan – pa tene mas klaridat riba salú i bienestar di nan mes.

Ehempel di preguntanan:

• Den e último 12 lunanan, kuantu dia bo a falta trabou debí na problema di salú?
• Ki dia tabata e último biaha ku bo a bishitá un dentista òf ortodonsista pa bo mes?
• Ki dia tabata e último biaha ku bo a konsultá un dòkter di kas pa bo mes?
• Generalmente, kon satisfecho bo ta ku e kuido di salú na Kòrsou?
• Ki medida bo ta tuma pa mantené un bida salú?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.