Enkuesta Sosial 2025

Labor ta importante den un komunidat; e ta sòru pa kresementu ekonómiko. Hende ku ta traha ta produsí produkto i servisionan ku ta mantené i pone e ekonomia sigui krese. Informashon tokante ken tin trabou, ken ta buska trabou, i kon e kondishonnan di trabou ta, ta duna un bista kla riba e oportunidatnan i desafionan laboral na Kòrsou. E ta yuda pa drecha maneho, pa traha mas kupo di trabou.

Informashon tokante Merkado Laboral (Trabou i entrada) ta importante pa:

1. Gobièrnu i trahadó di maneho – pa desaroyá maneho tokante labor, formashon i desaroyo ekonómiko.
2. Empresario i sektor privá – pa komprondé oferta i demanda di labor i planifiká mas mihó nan negoshi.
3. Institushon di edukashon i formashon – pa aliniá e konosementu i abilidat di e poblashon ku e nesesidat real di merkado laboral.
4. Organisashonnan sosial i sindikal – pa defendé derecho i kondishon di empleadonan.
5. Komunidat i individuonan – pa haña klaridat riba oportunidat di trabou i situashon di merkado laboral na nos isla.
   
   E dato di merkado laboral ta yuda gobièrnu, negoshi, skol i komunidat pa tuma desishon ku ta kreá mas oportunidat pa trabou i un ekonomia mas fuerte.

Ehempel di preguntanan:

• Bo tin trabou of bo ta buskando trabou ?
• Bo tin un propio negoshi?
• Den kua ramo e empresa ta kai
• Kua posishon ekonomiko bo tin na e trabou
• Bo ta buskando trabou i dikon?
• Ku at bo entrada
• Bo ta hasi trabou boluntario?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Koheshon sosial ta referí na kuantu konfiansa hende tin den nan bisiña, institushonnan i gobièrnu.  E ta mustra si hende por konta riba otro den momentu di mester. E ta indiká tambe kuantu hende ta partisipá den aktividatnan sosial, kultural òf di komunidat. 
Ta importante pa entre otro gobièrnu i organisashonnan di bario i organisashonnan sosial, tin e datonan aki pa asina traha maneho dirigí pa hisa e kalidat di bida den barionan na Kòrsou

Den un enkuesta sosial, e tipo di informashon tokante koheshon sosial ta importante prinsipalmente pa:

1. Gobièrnu – pa komprondé nivel di konfiansa i partisipashon sosial, i pa disidí riba maneho públiko ku por yuda fortalesé komunidatnan.
2. Organisashonnan di bario – pa sa kon kuantu hende ta dispuesto pa traha huntu i pa planifiká aktividatnan ku ta sirbi komunidat.
3. Organisashonnan sosial i kultural – pa evaluá kon hende ta partisipá den bario, i pa adaptá programanan ku ta stimula integrashon i partisipashon.

E datonan ta útil pa tur instansia ku ta traha riba kalidat di bida i unidat den komunidat na Kòrsou.

Ehempel di preguntanan:

• Hende ta sinti nan mes na kas den nan bario?
• Kuantu konfiansa nan tin den gobiernu, polis i bisiñanan?
• Kuantu bia nan ta partisipá den aktividatnan di bario òf trabou voluntario?
• Hende ta sinti nan mes involví den proseso polítiko òf sosial?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Deporte i kultura ta parti fundamental di desaroyo personal i di un komunidat. Partisipashon na aktividatnan deportivo ta stimulá aktividat físiko ku ta mehorá salú, baha riesgo di malesa, pa mantené un estilo di bida balansá. Informashon riba nivel di partisipashon ta importante pa sektor di salú pa traha riba prevenshon i promoshon di bida saludabel. Na mesun manera, partisipashon den aktividatnan kultural i artístiko ta reflehá identidat i tradishon di pueblo. Kolekshon di data tokante partisipashon kultural ta mustra kon hende ta ekspresá su kreatividat i sostené herensia. E ta sirbi pa gobièrnu i organisashonnan pa planifiká manehonan kultural, protehé patrimonio i stimula edukashon i konsientisashon entre hóbennan.

Informashon tokante partisipashon deportivo i kultural ta importante pa:

1. Sektor di salú – pa komprondé nivel di aktividat físiko den komunidat i traha riba prevenshon di malesa.
2. Gobièrnu – pa planifiká politika públiko pa deporte, arte i kultura, i pa protehé patrimonio kultural.
3. Organisashonnan sosial, di bario i kultural – pa sa kon komunidat ta partisipá, i pa desaroyá programanan ku stimula integrashon, kreatividat i un estilo di bida saludabel.

E dato ta útil pa tur instansia ku ke hisa kalidat di bida i fortalesé identidat di nos komunidat.

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Ehempel di preguntanan:

• Ki tipo di aktividat kultural of deportivo bo ta hasi regularmente?
• Kiko ta stroba bo pa no partisipá den deporte of aktividatnan kultural?
• Bo ta sinti bo por eksprèsá bo mes den kultura lokal?
• Kuantu ora pa siman bo a praktiká deporte?
• Ki deporte bo a bishitá komo ekspektador ?
• Kuantu biaha bo ta hasi un aktividat kultural?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Edukashon ta duna hende konosementu, abilidat i konfiansa pa mehorá nan mes bida. Datonan di edukashon ta duna un bon bista kon e nivel di edukashon ta den un pais. Asina por traha maneho e.o. pa e merkado laboral. 

Informashon tokante Edukashon ta importante pa:

1. Gobierno i trahado di maneho – pa planifiká maneho di edukashon i programanan di formashon ku ta kubri nesesidat di komunidat.
2. Skol i edukadó – pa adapta metodo i kontenido segun nivel i demandanan real di e hoben.
3. Institushon di formashon i empleo – pa prepará hende ku abilidat ku ta nesesario den merkado laboral.
4. Sektor di salú i bienestar – pasobra edukashon tin un influensia direkto riba eskoho di un estilo di bida saludable.
5. Organisashonnan sosial i komunidat – pa promové partisipashon, inklushon i koheshon sosial.
6. Famianan i individuanan – pa yuda traha riba eskoho pa futuro di nan mes i di nan mucha.

Ehempel di preguntanan:

• Bo ta sigui aktuálmente skol, kurso òf estudio ?
• Na kua pais bo a sigui e estudio aki?
• Kuantu haltu nivel di estudio bo a logra ?
• Ki motibu prinsipal bo a skohe pa studia na Kòrsou?
• Bo tin un debe di estudio aktuálmente?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Un bon salú ta permití hende biba mas largu, felis i ta mas produktivo. Hende saludabel por traha, studia i kontribuí na ekonomia. Informashon di salú i bienestar ta mustra kon hende mes ta haña nan salú, kon nan ta haña kuido médiko i si nan tin akseso na e servisionan ku nan mester. Ku e informashon aki por ahustá maneho di salubridat.

E informashon tokante salubridat ta util pa: 

1. Ministerio di Salú i gobièrnu – pa planifiká kuido médiko i maneho públiko mihó.
2. Sektor di salú – pa komprondé kon hende ta haña kuido.
3. Organisashonnan sosial i di bario – pa identifiká nesesidat lokal i promové estilo di bida saludabel.
4. Komunidat i famianan – pa tene mas klaridat riba salú i bienestar di nan mes.

Ehempel di preguntanan:

• Den e último 12 lunanan, kuantu dia bo a falta trabou debí na problema di salú?
• Ki dia tabata e último biaha ku bo a bishitá un dentista òf ortodonsista pa bo mes?
• Ki dia tabata e último biaha ku bo a konsultá un dòkter di kas pa bo mes?
• Generalmente, kon satisfecho bo ta ku e kuido di salú na Kòrsou?
• Ki medida bo ta tuma pa mantené un bida salú?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Media ta un kanal esensial pa informashon i formashon di opinion. Datonan di media ta mustra kon hende ta haña notisia, si nan tin konfiansa den kanalnan di informashon i ki ròl media ta hunga den nan bida sosial i riba e área di polítika.

E informashon tokante Media ta útil pa:

1. Gobiernu di Kòrsou – pa komprondé kon siudadanonan ta haña notisia i kuantu konfiansa nan tin den media.
2. Medionan di komunikashon – pa sa kua fuente hende ta prefera i kon nan ta forma nan opinion.
3. Institushonnan di edukashon – pa siña hobennan kon pa maneha ku medionan di komunikashon di manera responsabel.
4. Organisashonnan sosial i komunidat – pa usa media pa promové partisipashon i konsientisashon riba temanan sosial i polítiko.
5. Siudadanonan – pa komprondé kon media ta influensia nan opinion i bida diario.

Ehempel di algun pregunta ta:

• Bo ta skucha radio?
• Na ki momento bo ta skucha radio?
• Ki tipo di programa bo ta wak mas riba televishon?
• Bo ta lesa korant?
• Kua plataforma di medio sosial bo ta usa?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Informashon tokante viktimashon i seguridat ta importante pasobra e ta yuda komprondé kon sigur hende ta sinti nan mes den bida diario i ki peliger nan ta enfrentá.  E ta mustra kuantu krímen òf violensia hende ta eksperensiá den komunidat. Pa entre otro kuerpo polisial i sistemanan di hustisia, ta importante pa komprondé unda e problema ta, pa por protehá komunidat mihó.

E informashon tokante viktimashon i seguridat ta importante pa:

1. Kuerpo polisial – pa komprondé unda i ki tipo di krímen ta pasa mas, pa por traha mihó plan di kontrol.
2. Sistema di hustisia – pa haña klaridat riba nivel di viktimashon i pa atende e problema den un manera mas efisiente.
3. Gobièrnu – pa disidí riba maneho di seguridat i prevenshon di krímen.
4. Organisashonnan di komunidat – pa yuda promové barionan sigur i apoyá viktimanan.
5. Siudadanonan – pa komprondé situashon di seguridat den nan bario i tuma medida preventivo.

Ehempel di algun pregunta:

• Kon seif bo ta sinti bo ora bo ta kanando den bo bario anochi?
• Kiko bo ta pensa di esfuerso polisial pa mantené krímen bou di kòntròl den bo bario?
• Kuantu biaha bo sa mira un agente polisial den bo kaya?
• Abo òf un miembro di bo unidat a bira víktima di un krímen?
• Bo a yega di bira víktima di tentamentu ?
• Bo ta disponé di algun metodonan pa protehá bo kontra krímen?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Informashon tokante nesesidat di kas ta un guia pa konstrukshon, infrastruktura i desaroyo urbano. E data aki ta laga mira si tur hende, di diferente grupo sosial, tin akseso na un kas adekuá, ku ta yuda baha desigualdat. Asina e Ministerio enkargá ku asuntunan di bibienda por komprondé e demanda i mehorá planifikashon pa kas i fasilidatnan nobo.

E informashon tokante bibienda ta util pa: 

1. Gobiernu di Kòrsou – pa sa tokante skarsedat di kas, ken tin mester di kas, i pa planifiká desaroyo di bario i infrastruktura.
2. Fundashonnan sosial i di bario – pa wak si tur grupo, inkluyendo hende ku entrada abou, tin akseso na kas adekuá.
3. Desaroyadonan i kompania di konstrukshon – pa ofresé kas ku ta keda den nesesidat real di komunidat.

Ehempel di algun pregunta:

1. Ki tipo di kas bo ta biba aden awor?
2. Riba ki tipo di tereno bo kas ta para?
3. Si bo ta hürder: kuantu bo ta paga pa hür pa luna, inkluí òf ekskluí servisio básiko?
4. Si bo ta doño di kas: bo tin hipotek, i kuantu bo ta paga pa luna?
5. Kuantu bo ta paga pa servisio básiko manera awa, lus òf gás pa luna?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.

Nos ta biba den e era digital. Uso di internèt, selular i inteligensia artifisial ta forma parti di nos bida diario. Pero pa sa kon nos siudadanonan realmente ta hasi uso di teknologianan moderno, nos mester tin datonan aktualisá.

E informashon tokante ICT ta importante pa:

1. Gobiernu di Kòrsou – pa desaroyá politika digital i regulá uso di teknologia den isla.
2. Ministerio di Enseñansa i institushonnan skol – pa adapta edukashon na nesesidat digital di studiante.
3. Empresanan di telecom i teknologia – pa mehorá servisio i sa kon hende ta usa internèt i selular.
4. Medionan di komunikashon – pa komprondé kuantu publiko ta depende di medionan digital pa notisia i informashon.
5. Organisashonnan sosial i komunidat – pa yuda hende ku tin ménos akseso siña i partisipá den era digital.

Ehempel di algun pregunta:

• Kuantu liña di telefòn fiho tin den bo famia?
• Bo famia tin un konekshon di internèt?
• Ki sorto di konekshon di internèt bo famia tin?
• Bo a hasi uso di un kòmpiuter den e último 3 lunanan?
• Skohe e 3 aparatonan mas importante ku bo ta usa via bo konekshon di internèt.
• Kua di e siguiente ekiponan di inteligensia artifisial bo a usa resientemente?

Informashon riba e tema aki ta un pida pùzel ku, huntu ku e otro temanan, lo kompletá e pùzel kompleto di e bida sosial na Kòrsou.