CBS ta start ku Enkuesta di Koyuntura pa aña 2021 i ta presentá resultadonan di e promé mitar di aña 2021

Willemstad - Ofisina Sentral di Statistik (CBS) a kuminsá dia 15 di novèmber 2021 ku e di dos Enkuesta di Koyuntura na Kòrsou pa aña 2021 i alabes ta publiká resultadonan di e promé mitar di aña 2021.

E enkuesta aki ta pa tur kompanianan ku dies òf mas trahadó, miéntras serka e kompanianan ku ménos ku 10 trahadó lo hasi un sondeo. Meta di e enkuesta aki ta pa riba un base frekuente duna informashon riba desaroyo ekonómiko i empresarial. Total lo enkuesta mas o ménos 900 kompania. Tur empresa lo yena e formulario digital riba wèpsait di CBS.

Algun resultadonan di Enkuesta di Koyuntura pa e prome mitar di aña 2021 ta:

  • Konfiansa den futuro serka e empresanan a subi di 41% na luna di desèmber 2020 pa 50% pa e promé mitar di aña 2021
  • Pa e promé mitar di aña di 2021, 58% di empresanan a indiká di lo tin un bahada di volúmen di benta, esaki ta porsentahe ménos haltu kompara ku 2020 kual ta 79%. Un subida di volúmen di benta ta ser premirá serka 27% di empresanan.
  • Kasi 76% di e empresanan a indiká ku efektonan di pandemia di Covid-19 i ‘lockdown’ tabata tin un influensia riba e volúmen di benta. E índise di koyuntura basá riba e sifranan di konfiansa den futuro, persepshon di klima di invershon i desaroyo di benta ta indiká 56 na promé mitar di aña 2021, esaki ta 22 punto mas tantu ku na desèmber 2020.

Pa midi e efekto di e sosten ku Gobièrnu a implementá pa medio di ‘NOW’, ‘Toeslag vaste lasten (TVL)’ i otro sostennan kual a duna empresanan, CBS konhuntamente ku VBC a hasi e empresanan algun pregunta tokante di e topiko aki banda di e otro preguntanan ku tabatin kaba di efektonan di pandemia di Covid-19 riba nan aktividatnan empresarial. Resultado di e preguntanan aki ta:

  • 52% di empresanan a indiká di a hasi uso di sosten di gobièrnu via ‘NOW’ i ‘Toeslag vaste lasten (TVL)’, i otro areglonan.
  • Riba e pregunta kua otro medidanan di sosten lo ta bon pa yuda e empresanan, 61% di e empresanan a indiká bahada of pospone pagamentu di impuesto. Kasi 18% di empresanan a indiká ku un kambio den lei laboral lo  yudanan.

Pa mas informashon por download e relato kompleto di e resultadonan di Enkuesta di Koyuntura di promé mitar di aña 2021 akinan Business Cycle Survey Publications | Central Bureau of Statistics Curaçao (cbs.cw)

CBS ke gradisí tur e empresanan ku a yena e formulario. Sin nan yudansa CBS lo no por publiká e sifranan ariba menshoná. CBS ta konta ku koperashon di tur empresa pa yena e Enkuesta di Konyuntura 2021 pa fin di aña 2021.