CBS ta kuminsá prepará pa Senso 2022 ku su Senso di Prueba

Willemstad - Entre 11 di novèmber 2021 i 23 di yanüari 2022 Ofisina Sentral di Statistiek (CBS) ta tene un Senso di Prueba bou di 5.000 kas di famia.

E Senso di Prueba ta en konekshon ku preparashonan pa e konteo general di poblashon i bibienda (Senso) kual lo bai tuma luga otro aña. Senso 2022 ta e di 2 senso ku CBS lo organisá pa Kòrsou. E promé tabata na aña 2011. CBS a yega di organisá senso promé ku 10 di òktober 2010 un total di 5 senso mas, pero eseinan tabata pa Antia Hulandes.

CBS ta bai organisá Senso 2022 kompletamente digital. Kompará ku e sensonan anterior, esaki ta nifiká ku lo tin kambio organisatorio importante. Pa e motibu aki, e Senso di Prueba ta di sumo importansia.

Durante e Senso di Prueba lo tèst entre otro e siguiente aspektonan:

• e lista di pregunta digital
• e proseduranan digital ku lo usa durante e periodo di konteo pa garantisá e kalidat di e datonan kolektá
• e prosesonan digital pa analisá e datonan optení
• e métodonan digital ku lo usa pa prosesá datonan i publiká e informashon kolektá
• e proseso di kolektá data (online/sentro di bario/telefonikamente)

Tur e kasnan di famia ku risibí di CBS un karta ku e petisho pa partisipá na e Senso di Prueba mester subi e website di senso https://senso.cbs.cw. Na man drechi nan ta mira “Partisipá na Senso di Prueba”. Aki nan por sigui e instrukshonan i kuminsá yena e lista di pregunta online.

Si e kas di famia no tin akseso na internèt, por yama 724-2227 pa traha un sita pa yuda yena e lista di pregunta.

For di 20 di novèmber por akudí na 3 sentro di bario, kaminda tin e espasio i personal nesesario pa yuda yena e lista di pregunta. E sentronan di bario ta Wishi/Marchena, Soto i Montaña. Nan lo ta habrí di 8 or di mainta te ku 7 or di anochi.

Tur informashon tokante e Senso di Prueba ta disponibel riba e website https://senso.cbs.cw. Tur sifra ku CBS kolektá ta keda tratá den forma anónimo segun e Ordenansa (Landsbesluit) Nashonal di Statistik. Por lesa e detayenan di e Ordenansa aki riba e website www.cbs.cw di CBS.

Pa kualkier pregunta tokante di Senso di Prueba por yama na 724-2227 òf por manda un email na senso@cbs.cw.

CBS ta hasi un petishon di e forma aki na tur e 5.000 kasnan di famia pa kontribuí i yena e formulario online, i asina yuda pa e organisashon di Senso 2022 por kana sin niun problema.

For di awor CBS ta gradesí e kasnan di famia pa nan kolaborashon.