CBS ta kuminsá ku Enkuesta Sosial 2026

Willemstad – Ofisina Sentral di Statistik (CBS) ta kuminsá dia 26 di sèptèmber 2026 ku trabou di tereno pa Enkuesta Sosial 2026. Pa e enkuesta akí, un selekshon di adrès na Kòrsou lo risibí bishita di un enkuestadó di CBS.

Dikon Enkuesta Sosial?

Meta di Enkuesta Sosial ta pa kolektá informashon ku ta yuda forma un mihó bista di situashon sosial i kondishonnan di bida di e poblashon di Kòrsou. E resultadonan ta sirbi komo fuente di informashon estadístiko pa investigashon, planifikashon, desaroyo di maneho i toma di desishon.

Kua tópikonan e enkuesta ta trata?

Enkuesta Sosial 2026 ta kontené pregunta riba kuater tema prinsipal:

• Labor – Informashon tokante ken tin trabou, ken ta buska trabou, entrada i kondishonnan di trabou ta yuda nos komprondé mihó e situashon di merkado laboral.
• Bibienda – situashon di bibienda, si e kas ta adekuá i aksesibel, i si gastunan di bibienda ta pagabel
• Salubridat – informashon tokante salú, kuido médiko, prevenshon, aktividat físiko, alimentashon, strès i sosten sosial.
• Kalamidat – kon prepará poblashon di Kòrsou ta pa situashonnan di emergensia i òf krísis.

Dikon mi kas a ser selektá?

Pa Enkuesta Sosial, CBS ta usa un ‘steekproef’. Esaki ta un selekshon di adrès for di tur adrès na Kòrsou ku ta ser skohé pa partisipá den e enkuesta. E informashon ku CBS ta kolektá serka e kasnan selekshoná ta yuda forma un bista representativo di poblashon di Kòrsou.

Tur kas ku a ser selektá lo risibí un karta di CBS adelantá, informando nan tokante e investigashon.

Rekonosé enkuestadó di CBS

Durante e periodo di trabou di tereno, enkuestadónan di CBS lo bishitá e adrèsnan selekshoná. E enkuestadó por identifiká su mes ku un identifikashon ofisial di CBS.

Si un persona tin duda si e persona na porta realmente ta un enkuestadó di CBS, e por tuma kontakto ku CBS pa verifikashon. (nr di telefon di CBS ta 724 1802).

Bo informashon ta konfidensial

Tur informashon ku CBS ta kolektá durante e enkuesta ta ser tratá estriktamente konfidensial i ta ser usá pa fin estadístiko. Resultadonan ta ser publiká di tal manera ku no por identifiká un persona òf kas di famia individual.

Bo partisipashon ta konta

Partisipashon di e kasnan selekshoná ta importante. Un bon partisipashon ta yuda CBS kolektá dato konfiabel i representativo ku ta duna un mihó bista di situashon di e poblashon di Kòrsou.

CBS ta gradisí di antemano tur e kasnan selekshoná pa nan tempu i kolaborashon.

Pa mas informashon tokante Enkuesta Sosial 2026, e tópikonan, steekproef, FAQ i kon pa rekonosé un enkuestadó, bishitá e página spesial di Enkuesta Sosial 2026 riba wèpsait di CBS, www.cbs.cw/es2026