Djárason, 29 mei CBS a firma un akuerdo di kolaborashon ku Bureau Telecommunicatie & Post (BTP) kaminda e dos instansianan aki ta bai traha ekstensivamente huntu den kuadro di un data ekosistema.

Un data ekosistema ta un sistema paresido na esun ekológiko kaminda data ku ta bini for di diferente suministradó ta wòrdu integrá den un sistema balansa ku por duna den futuro un mihó bista riba e funshonamentu di un komunidat su karakterístikanan sosial i ekonómiko

Na 2016 Kòrsou a komprometé su mes ku Agènda 2030 i ku Sustainable Development Goals (SDGs) I e Plan Nashonal ta fungi den esaki komo un guia pa desaroyo di diferente SDGs. CBS tin un ròl importante den e trayekto aki komo instansia ku ta kolekta, balidá datonan I tambe monotonia e desaroyo di e indikadónan. CBS ta traha pa basta tempu ku diferente suministradó di datonan (semi) gubernamental i organisashonnan priva. Den pasado a firma diferente akuerdo di kooperashon ku e instansianan ariba menshoná.

Despues di e Bon Bini summit na luna di yanüari CBS Kòrsou i CBS Hulanda a tuma e inisiativa pa krea un data ekosistema. Krea un database integrá, kompleto i struktura (manehá dor di CBS Kòrsou) ku por ser uza pa tur proyektonan den futuro ku ta a base di data.

Na luna di mart i e siman ku a kaba aki CBS Kòrsou i CBS Hulanda konhuntamente a tene un presentashon na diferente instansianan, (semi) gubernamental i priva ku ta suministrá dato pa asina splika e instansianan aki e balor di e data ekosistema i yega na palabrashonnan pa asina kuminsá traha huntu pa nan suministrá datonan ku ta ser produsí riba un base regular. CBS komo e instansia ku ta reglá pa lei pa garantisá privasidat di datonan i pa trese datonan di instansianan priva i gubernamental ta e instansia ku ta trèk e proyekto aki.