CBS Kòrsou ta lansa dashboard nobo tokante Indèks di Preis di Konsumidó (CPI) riba su wèpsait

WILLEMSTAD — Ofisina Sentral di Statistik (CBS) Kòrsou a lansa un Dashboard tokante Indèks di Preis di Konsumidó (CPI) nobo riba su wèpsait ofisial. Ku e instrumento interaktivo aki, informashon tokante Indèks di Preis di Konsumidó (CPI) ta bira mas aksesibel, mas kla i mas fásil pa tur hende por usa.

E CPI Dashboard ta ofresé usuarionan e oportunidat pa sigui e desaroyo di preisnan na Kòrsou di un manera visual i dinámiko. Usuarionan por wak tendensianan, analisá sifranan di inflashon i konsultá kambionan di preis pa diferente kategoria di konsumo. 

Informashon ku ta aksesibel riba e dashboard ta: 

• Informashon di preis di konsumidó pa luna
• Sifranan históriko di inflashon
• informashon di preis di konsumido pa diferente kategorianan di konsumo pa luna  i pa aña.

Indèks di Preis di Konsumidó ta un indikadó importante ku ta mustra desaroyo di inflashon i kosto di bida. Representantenan polítiko, empresarionan, investigadónan i siudadanonan ta usa e sifranan aki pa sigui desaroyonan ekonómiko i fundamentá desishonnan ku tin ku wòrdu tumá.

Ku lansamentu di e CPI Dashboard, CBS ta hasi un otro paso den digitalisashon i modernisashon di su servisionan. E presentashon interaktivo ta fasilitá un mihó interpretashon di datonan i ta permití pa tendensianan wordu identifiká mas lihé.

E dashboard ta wòrdu di update tur luna ora CBS publiká e sifra nobo pa luna di CPI.

E CPI Dashboard ta disponibel for di awor riba wèpsait ofisial di CBS Kòrsou: www.cbs.cw/inflationprices