CBS ta duna e kasnan di famia pa promé biaha e posibilidat pa yena enkuesta online den kuadro di Enkuesta Forsa Laboral 2019.

logo
Search

CBS ta duna e kasnan di famia pa promé biaha e posibilidat pa yena enkuesta online den kuadro di Enkuesta Forsa Laboral 2019.

Den afan di CBS pa stimulá progreso i inovashon, i pa asistí e respondentenan mas efisiente posibel, CBS ta introdusí e posibilidat di yena enkuesta online. CBS ta introdusi esaki pa promé biaha bou di kasnan di famia ku a wòrdu selektá pa medio di un muestra pa partisipá na e Enkuesta Forsa Laboral 2019.

Enkuesta di Forsa Laboral ku Ofisina Sentral di Statistik Kòrsou (CBS) ta ser organisá dos biaha pa aña, ta un enkuesta bou di kasnan di famia na  Kòrsou, kaminda tur miembro di e unidat di famia ta ser entrevistá tokante di nan situashon laboral. 

E biaha aki ta duna e kasnan di famia e posibilidat pa yena e enkuesta online durante di un siman. E periodo aki ta entre promé ku 15 di mart próksimo. Si den kaso ku no a logra di yena e enkuesta online ta sigui un periodo kaminda CBS ta manda un ekuestado pa asisití e kas di famia pa yena e formulario. E periodo aki ta entre 30 di mart te 11 di mei.

Tur e 2650 kasnan di famia ku a kai den e muestra a risibi un karta di CBS kaminda ta spika e proseso i tin e instrukshonan kon nan tin ku yena e lista di pregunta online. Tambe nan a risibi un foyeto ku mas i formashon di e enkuesta laboral su meta etc.

Cbs ta urgi tur e kasnan di famia ku a kai den e muestra pa yena e formulario online. Esaki ta tuma minimal 5 minut di nan tempu i ta mas fasil pasombra bo ta yena na e momentu ku ta kombiní e kasnan di famia mas mihó.

Si den kaso ku un kas di famia a yega di kai den e muestra otro aña nan mester yena e formulario tòg un biaha mas. CBS no ta tene record di personanan individual (tur enkuesta ta anónimo) di na situashon laboral. CBS ke sa e situashon aktual. Esaki por kambia masha lihe mes. Pesei CBS ta urgí tur persona pa duna nan aporte tur biaha ku bati na nan porta.

CBS ta obligá pa lei pa tene tur dato ku a ser kolektá konfidensial i sekreto.

CBS ta gradesí tur kas di famia pa nan koperashon pa hasi e enkuesta aki bira un éksito.

CBS ta publiká tur resultadonan di enkuestanan riba su website www.cbs.cw. Tur informashon por wòrdu di download gratís for di akinan.